Presidenti rus, Vladimir Putin, ka njoftuar krijimin e një “zone sigurie” përgjatë kufirit mes Rusisë dhe Ukrainës, e cila, sipas Moskës, do të shtrihet në territorin ukrainas përgjatë një gjatësie prej 660 kilometrash. Kreu i Kremlinit deklaroi se kjo çështje nuk do të jetë objekt negociatash në bisedimet e ardhshme të paqes me Kievin.
Mediat e huaja bëjnë me dije se deklarata u bë gjatë një vizite në një qendër komande ushtarake, ku Putin u shfaq i veshur me uniformë ushtarake. Ai argumentoi se krijimi i zonës është pjesë e përgjigjes së Rusisë ndaj ofensivës ukrainase në rajonin rus të Kurskut gjatë viteve 2024-2025.
“Forcat e armatosura ruse morën përsipër jo vetëm të dëbojnë armikun nga territori ynë, por edhe të krijojnë një zonë sigurie në territorin fqinj. Kjo detyrë po kryhet me sukses”, deklaroi Putin.
Ai theksoi se synimi i Moskës është të garantojë sigurinë e zonave kufitare ruse dhe se nuk ka ndërmend ta diskutojë këtë çështje në negociatat e ardhshme të paqes me Ukrainën. Sipas zëdhënësit të Kremlinit, Dmitry Peskov, zona e planifikuar do të ketë një gjatësi prej 660 kilometrash, ndërsa rreth 70% e saj ndodhet tashmë nën kontrollin e forcave ruse. Megjithatë, nuk është bërë e ditur se sa thellë do të shtrihet zona brenda territorit ukrainas.
Për realizimin e këtij objektivi, Rusia do të duhej të merrte nën kontroll edhe territore në rajonet ukrainase të Sumyt dhe Kharkivit, të cilat nuk kontrollohen aktualisht nga forcat ruse. Gjatë fjalimit të tij, Putin foli edhe për situatën në front, duke deklaruar se ushtrisë ruse i duhet të marrë ende nën kontroll rreth 10% të rajonit të Donetskut dhe 16.5% të rajonit të Zaporizhias. Ai vlerësoi gjithashtu sulmet ruse ndaj objektivave ushtarake, industriale dhe logjistike në Ukrainë, ndërsa pranoi se ka ende hapësirë për përmirësime në sistemin rus të mbrojtjes ajrore. Ndërkohë, sulmet vazhdojnë nga të dyja palët.
Dronët ukrainas kanë goditur së fundmi disa qendra të të dhënave në Rusi dhe një rafineri të madhe, ndërsa forcat ruse vijojnë sulmet ndaj qyteteve, porteve dhe infrastrukturës energjetike të Ukrainës. Njoftimi i Putinit vjen në një moment kur perspektiva e negociatave të paqes mbetet e ndërlikuar, ndërsa Moska po paraqet kërkesa të reja territoriale dhe të sigurisë që mund të ndikojnë në çdo marrëveshje të ardhshme me Kievin.
